Yamunanagar ਵਿੱਚ ਦਰਦਨਾਕ ਸੜਕ ਹਾਦਸਾ, ਟਰੱਕ ਪਲਟਣ ਕਾਰਨ ਇੱਕੋ ਪਰਿਵਾਰ ਦੇ 4 ਜੀਆਂ ਦੀ ਮੌਤ, ਇੱਕ ਮਹਿਲਾ ਗੰਭੀਰ ਜ਼ਖ਼ਮੀ

ਯਮੁਨਾਨਗਰ: ਹਿਮਾਚਲ ਪ੍ਰਦੇਸ਼ ਅਤੇ ਹਰਿਆਣਾ ਦੀ ਸਰਹੱਦ 'ਤੇ ਜਗਾਧਰੀ-ਪਾਂਵਟਾ ਨੈਸ਼ਨਲ ਹਾਈਵੇਅ 'ਤੇ ਲਾਲਢਾਂਗ ਨੇੜੇ ਸ਼ੁੱਕਰਵਾਰ ਸਵੇਰੇ ਕਰੀਬ 10 ਵਜੇ ਵਾਪਰੇ ਸੜਕ ਹਾਦਸੇ ਵਿੱਚ ਪਿਤਾ ਅਤੇ ਦੋ ਧੀਆਂ ਸਮੇਤ ਇੱਕੋ ਪਰਿਵਾਰ ਦੇ ਚਾਰ ਲੋਕਾਂ ਦੀ ਮੌਤ ਹੋ ਗਈ, ਜਦੋਂ ਕਿ ਇੱਕ ਮਹਿਲਾ ਗੰਭੀਰ ਜ਼ਖ਼ਮੀ ਹੋ ਗਈ। ਹਾਦਸਾ ਉਸ ਵੇਲੇ ਵਾਪਰਿਆ ਜਦੋਂ ਇਹ ਪਰਿਵਾਰ ਦੋ ਮੋਟਰਸਾਈਕਲਾਂ 'ਤੇ ਹਿਮਾਚਲ ਪ੍ਰਦੇਸ਼ ਸਥਿਤ ਰੇਣੁਕਾਜੀ ਮੰਦਰ ਜਾ ਰਿਹਾ ਸੀ।

ਇਸੇ ਦੌਰਾਨ ਕਲੇਸਰ ਨੈਸ਼ਨਲ ਪਾਰਕ ਨੇੜੇ ਲਾਲਢਾਂਗ ਇਲਾਕੇ ਵਿੱਚ ਪਹਾੜੀ ਢਲਾਣ ਤੋਂ ਉਤਰ ਰਿਹਾ ਮੱਕੀ ਨਾਲ ਲੱਦਿਆ ਇੱਕ ਟਰੱਕ ਬੇਕਾਬੂ ਹੋ ਕੇ ਸੜਕ 'ਤੇ ਪਲਟ ਗਿਆ ਅਤੇ ਦੋਵੇਂ ਮੋਟਰਸਾਈਕਲ ਟਰੱਕ ਦੇ ਹੇਠਾਂ ਦੱਬ ਗਏ। ਹਾਦਸੇ ਵਿੱਚ ਥਾਣਾ ਪ੍ਰਤਾਪਨਗਰ ਖੇਤਰ ਦੇ ਪਿੰਡ ਚੂਹੜਪੁਰ ਕਲਾਂ ਦੇ ਰਹਿਣ ਵਾਲੇ ਰਾਜੇਂਦਰ ਧੀਮਾਨ (45), ਉਨ੍ਹਾਂ ਦੀਆਂ ਧੀਆਂ ਸਿਮਰਨ ਉਰਫ਼ ਸਿੱਮੀ (14) ਅਤੇ ਮਿਨਲ ਉਰਫ਼ ਮਿੰਨੀ (12) ਦੇ ਨਾਲ-ਨਾਲ ਰਾਜੇਂਦਰ ਦੀ ਭੈਣ ਦੇ ਦਿਓਰ, ਪਿੰਡ ਦੌਲਤਪੁਰ ਦੇ ਰਹਿਣ ਵਾਲੇ ਫੂਲ ਸਿੰਘ ਦੀ ਮੌਤ ਹੋ ਗਈ।

ਉੱਥੇ ਹੀ, ਰਾਜੇਂਦਰ ਦੀ ਪਤਨੀ ਊਸ਼ਾ (40) ਗੰਭੀਰ ਜ਼ਖ਼ਮੀ ਹੋ ਗਈ। ਹਾਦਸੇ ਦੇ ਸਮੇਂ ਰਾਜੇਂਦਰ ਦੀਆਂ ਦੋਵੇਂ ਧੀਆਂ ਫੂਲ ਸਿੰਘ (40) ਦੇ ਮੋਟਰਸਾਈਕਲ 'ਤੇ ਪਿੱਛੇ ਬੈਠੀਆਂ ਸਨ, ਜਦੋਂ ਕਿ ਦੂਜੇ ਮੋਟਰਸਾਈਕਲ 'ਤੇ ਰਾਜੇਂਦਰ ਅਤੇ ਉਨ੍ਹਾਂ ਦੀ ਪਤਨੀ ਊਸ਼ਾ ਸਵਾਰ ਸਨ। ਪਰਿਵਾਰ ਸ਼ੁੱਕਰਵਾਰ ਸਵੇਰੇ ਕਰੀਬ ਨੌਂ ਵਜੇ ਪਿੰਡ ਚੂਹੜਪੁਰ ਕਲਾਂ ਤੋਂ ਰੇਣੁਕਾਜੀ ਮੰਦਰ ਲਈ ਰਵਾਨਾ ਹੋਇਆ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਪਰਿਵਾਰ ਪੁੱਤਰ ਦੀ ਸੁੱਖਣਾ (ਮੰਨਤ) ਪੂਰੀ ਹੋਣ 'ਤੇ ਮੰਦਰ ਜਾ ਰਿਹਾ ਸੀ। ਰਾਜੇਂਦਰ ਦੀਆਂ ਤਿੰਨ ਧੀਆਂ ਸਨ, ਜਿਨ੍ਹਾਂ ਵਿੱਚੋਂ ਸਭ ਤੋਂ ਛੋਟੀ ਧੀ ਘਰ ਵਿੱਚ ਆਪਣੀ ਦਾਦੀ ਕੋਲ ਰਹਿ ਗਈ ਸੀ।

ਟੁਕੜਿਆਂ ਵਿੱਚ ਬਿਖਰ ਗਈਆਂ ਲਾਸ਼ਾਂ

ਚਸ਼ਮਦੀਦਾਂ ਅਨੁਸਾਰ ਹਾਦਸਾ ਇੰਨਾ ਭਿਆਨਕ ਸੀ ਕਿ ਮੋਟਰਸਾਈਕਲ ਸਵਾਰ ਪੰਜੇ ਲੋਕ ਟਰੱਕ ਅਤੇ ਉਸ ਵਿੱਚ ਲੱਦੇ ਮੱਕੀ ਦੀਆਂ ਬੋਰੀਆਂ ਦੇ ਹੇਠਾਂ ਦੱਬ ਗਏ। ਮੱਕੀ ਦੀਆਂ ਕਈ ਬੋਰੀਆਂ ਸੜਕ 'ਤੇ ਖਿੱਲਰ ਗਈਆਂ। ਆਸ-ਪਾਸ ਦੇ ਲੋਕਾਂ ਦੀ ਮਦਦ ਨਾਲ ਪੁਲਿਸ ਨੇ ਮੱਕੀ ਦੀਆਂ ਬੋਰੀਆਂ ਹਟਾ ਕੇ ਲਾਸ਼ਾਂ ਨੂੰ ਬਾਹਰ ਕੱਢਿਆ।

ਰਾਜੇਂਦਰ ਧੀਮਾਨ, ਉਨ੍ਹਾਂ ਦੀਆਂ ਦੋਵੇਂ ਧੀਆਂ ਸਿਮਰਨ ਤੇ ਮਿਨਲ ਅਤੇ ਫੂਲ ਸਿੰਘ ਦੀ ਮੌਕੇ 'ਤੇ ਹੀ ਮੌਤ ਹੋ ਚੁੱਕੀ ਸੀ। ਲਾਸ਼ਾਂ ਦੇ ਕਈ ਟੁਕੜੇ ਹੋ ਚੁੱਕੇ ਸਨ, ਅਤੇ ਹੱਥ-ਲੱਤਾਂ ਸਰੀਰ ਤੋਂ ਵੱਖ ਹੋ ਕੇ ਦੂਰ ਜਾ ਡਿੱਗੀਆਂ ਸਨ। ਸਰੀਰ ਦੇ ਟੁਕੜਿਆਂ ਨੂੰ ਇਕੱਠਾ ਕਰਕੇ ਇੱਕ ਜਗ੍ਹਾ ਪਲਾਸਟਿਕ (ਲਿਫ਼ਾਫ਼ੇ) ਵਿੱਚ ਬੰਨ੍ਹਿਆ ਗਿਆ। ਰਾਜੇਂਦਰ ਦੀ ਪਤਨੀ ਊਸ਼ਾ ਨੂੰ ਗੰਭੀਰ ਹਾਲਤ ਵਿੱਚ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ।

ਰਾਜੇਂਦਰ ਲੱਕੜੀ ਅਤੇ ਮੋਟਰਸਾਈਕਲ ਰਿਪੇਅਰਿੰਗ ਦਾ ਕੰਮ ਕਰਦੇ ਸਨ। ਮਿੰਨੀ ਪਿੰਡ ਦੇ ਦੁਰਗਾ ਵਿਦਿਆ ਮੰਦਰ ਸਕੂਲ ਵਿੱਚ ਦਸਵੀਂ ਜਮਾਤ ਦੀ ਵਿਦਿਆਰਥਣ ਸੀ, ਜਦੋਂ ਕਿ ਸਿਮਰਨ ਗਿਆਰਵੀਂ ਜਮਾਤ ਵਿੱਚ ਪੜ੍ਹਦੀ ਸੀ। ਹਾਦਸੇ ਤੋਂ ਬਾਅਦ ਕ੍ਰੇਨ ਦੀ ਮਦਦ ਨਾਲ ਟਰੱਕ ਨੂੰ ਹਟਾ ਕੇ ਆਵਾਜਾਈ ਨੂੰ ਮੁੜ ਚਾਲੂ ਕਰਵਾਇਆ ਗਿਆ।